தமிழ் திரை உலகின் முன்னணி நட்சத்திரமாக விளங்குபவர் நடிகர் அஜித் குமார். இவர் நடிப்பு மட்டுமின்றி பைக் ரேஸ், கார் ரேஸ் சாகசத்தில் ஈடுபடுவது, ஃபோட்டோகிராபி, ஆளில்லா சிறிய ரக விமானம் தயாரித்தல், கல்லூரி மாணவர்களுக்கு ட்ரோன் பயிற்சி அளிப்பது போன்ற செயல்களில் ஆர்வமாக செயல்பட்டு வருகிறார்.
இவர், கடந்த இரண்டு ஆண்டுகளுக்கும் மேலாக சென்னை ரைஃபிள் கிளப்பில் துப்பாக்கி சுடும் பயிற்சி பெற்றுவருகிறார். எழும்பூர் பழைய காவல் ஆணையர் அலுவலகத்தில் உள்ள சென்னை ரைஃபிள் கிளப் உறுப்பினரான இவர், அவ்வபோது துப்பாக்கி சுடும் பயிற்சிக்காக அங்குவந்து பயிற்சியை முடித்துவிட்டு செல்வார். சமீபத்தில் இதே போன்று துப்பாக்கி சுடும் பயிற்சிக்காக வந்த அஜித்தை பார்த்த ரசிகர்கள் போட்டோ எடுத்து சமூகவலைதளத்தில் பதிவிட்டனர். இந்தப் புகைப்படங்கள் அடுத்த சில மணி நேரத்திலேயே வைரலாகி இந்திய அளவில் ட்ரெண்டானது.
இந்நிலையில், இன்று (மார்ச் 2) ஆவடி ரைபிள் கிளப்பில் நடிகர் அஜித் குமார் துப்பாக்கி சுடும் பயிற்சியில் ஈடுபட்டார். அப்போது எடுக்கப்பட்ட வீடியோ தற்போது சமூகவலைதளத்தில் வைரலாகி வருகிறது. கடந்த வாரம் அஜித் தனது நண்பர்களுடன் சைக்கிளிங் சென்ற புகைப்படம் சமூகவலைதளத்தை ஆக்கிரமித்திருந்தது.
இப்படி கடந்த சில வாரங்களாக அஜித் குறித்தான புகைப்படங்கள், வீடியோக்கள் சமூகவலைதளங்களில் வெளியாகி ரசிகர்களை மகிழ்ச்சியில் ஆழ்த்தி வருகிறது. இதற்கிடையில், அஜித் நடிப்பில் உருவாகி வரும் 'வலிமை' படத்தின் ஃபர்ஸ்ட் லுக் மோஷன் போஸ்டர் விரைவில் வெளியாகும் என அப்படத்தின் இயக்குநர் ஹெச். வினோத் கூறியிருப்பது ரசிகர்களை இரட்டிப்பு மகிழ்ச்சியில் ஆழ்த்தியுள்ளது.
